Halltilskotet
Fylkesmannen har konkludert med at Flora bystyre sitt vedtak om å
nytte 5 millionar kroner av forventa ekstraordinært utbyte frå SFE som
tilskot til Flora Idrettssenter AS var ulovleg.
Alle inntekter og utgifter skal disponerast i samsvar med det
kommunale budsjettet. Dersom det gjennom året blir kjent at det blir
endringar i inntektene til kommunen, skal desse først leggjast inn i
budsjettet ved budsjettrevisjon. Fylkesmannen meiner det er særleg viktig
at vesentleg auke i inntektene må sjåast i samanheng med dei økonomiske
utfordringane kommunen elles har. Ikkje minst må kommunen vurdere om
ekstrainntekter kan nyttast til å nedbetale underskot frå tidlegare år og
om inntektene gir følgjer for økonomiplanen for komande år.
Dei delane av bystyrevedtaket som ikkje var endelege, men berre
intensjonar om å vurdere endringar i låneforholdet, har ikkje
Fylkesmannen vurdert i lovlegkontrollen. Det kan først bli aktuelt når
avgjerda av realitetar er gjort.
Lovlegkontrollen er gjennomført i medhald av kommunelova § 59 nr. 5
om Fylkesmannen sin rett til å ta opp saker på eige initiativ.
Mindretalet i bystyret meinte også at bystyrevedtaket var ulovleg.
Budsjettet for 2008
Kommunen er underlagt statleg godkjenning og kontroll
(innmeldt i Robek), og kommunelova krev då at
Fylkesmannen kontrollerer om budsjettvedtaket er lovleg.
Fylkesmannen har godkjent budsjettet, men føreset at det som er
omtalt og vedteke i eige brev om lovlegkontroll vert vurdert i første
budsjettrevisjon.
Kommunen har ein stram økonomi. I økonomiplanperioden
må kommunen omdisponere, omprioritere og saldere for nærmare 50 mill.
kroner. Saman med høg lånegjeld, tyngande kapitalutgifter og ingen frie
reservar, betyr det at kommunen har store oppgåver framfor seg for å
oppnå ein reell balanse i økonomiplanperioden.
Kommunen har i omstillingsprogram og saldering av
økonomiplanen omtalt korleis dette skal gjennomførast. Vi vil følgje opp
at kommunen gjennomfører dette i framtidige plan- og styringsdokument.
Vidare meiner vi at kommunen må vurdere å nytte auka inntekter til
nedbetaling av underskot og avsetting til frie reservar. Jf. slik det er
omtalt og vedteke i eige brev om lovlegkontroll av disponering ekstra
utbytte frå SFE A/S.
Fylkesmannen følgjer opp kommunen og vil difor ha
tilsendt kvartalsvise rapportar, som i eit samandrag viser status i høve
rekneskap, forpliktande plan- og omstillingsarbeid.